نصائح لجعل شغلك في الكروشيه أرقى و ذو مظهر جذاب Tips for attractive work

السلام عليكم و رحمة الله و بركاته

نصائح لجعل شغلك في الكروشيه أرقى و ذو مظهر جذاب

1- كي التريكو و الكروشيه بالحرارة المناسبة و بالطريقة المناسبة يعطي العمل مظهر أنيق و يبدو كالمشغولات الجاهزة المباعة في أفخم الماركات التجارية

الأصواف حرارة متوسطة
الأقطان حرارة عالية
الألياف الصناعية حرارة منخفضة
لكي الكروشيه و بخاصة المفارش القطنية و الحريرية يفضل استخدام بخاخ النشا او الكي بالبخار على حرارة عالية للأقطان و متوسطة بفودرة للحرير

لكي التريكو ..سيري بالمكواة في اتجاهرأسي حتى لا يتسع قياس القطعة المشغولة عن الحجم المطلوب
أما غرز الدانتيل في التريكو فيمكنك معاملتها نفس معاملة مثيلاتها في الكروشيه
و لتفادي المخاطر إن كانت تجربتك الأولى في كي المشغولات اليدوية فابدئي بفودرة و على حرارة منخفضة حتى تصلي للنتيجة المطلوبة

2- تقفيل القطع الداخلي و نظافته وتلقيط الخيوط الداخلية و الخارجية يعطي مظهر جيد للعمل و يعطيه عمرا أطول و يحافظ عليه من التفكك مع تكرار الكي و الغسيل

3- الغسيل اليدوي أفضل للمشغولات اليدوية لكن يمكنك غسلها في الغسالة الأوتوماتيكية بدون عصر او بعصر خفيف

4- انتقاء الخيط المجدول جيدا و المتماسك القوام يعطي أفضل النتائج للمفروشات
أما الملابس المنتفشة فاختاري لها ما شئت بحسب ذوقك و نوع القطعة

5- ليست كل الخيوط التركية تركية ..هناك خيوط صناعات رديئة مغلفة على أنها مستوردة
و ليست كل الخيوط الصينية رديئة كذلك

6- الموهير التركي جيد لأنه صناعة بلاده و من حيوانات تلك المنطقة و لكن عليك انتقاء الخيط المناسب للأطفال
فالموهير الطبيعي لا يصلح دائما لذوي البشرة الحساسة و بخاصة الأطفال إلا لو كان بعيدا عن منطقة الكول او ثوب خارجي تحته أكثر من طبقة من الملابس القطنية
و لكن مع ذلك فطبقة واحدة من الموهير الطبيعي تعطي تدفئة أعلى من الأصواف الطبيعية الأخرى

7- يمكنك دمج خيطتين مختلفتين للحصول على مزيج رائع الألوان او لانتفاع بخامة مطاطية نسبيا في نسيج متماسك عن طريق دمج خيطتك ذات الشكل الجيد بخيطة قطن صافي لتعطيها التماسك المطلوب

8- المشغولات اليدوية في الاستخدام الشخصي عالية التوفير مقارنة بنظيرتها الجاهزة و ان استخدمتي أغلى الخامات .. لكن لا تصنعي الكثير من القطع بنفس الغرز او الخيط في نفس الموسم حتى لا يصبح شكلها مملا و متكررا

9- أناقتك في الثوب النظيف الجيد ..لكن احذري ثوب الخيلاء و الكبر فلربما يكون سبب في هلاك صاحبه او يؤول به إلى عذاب جهنم لا قدر الله

10- اشتري خيوط الموسم جملة لتحصلي على توفير أكبر و اشتري أيضا بكميات مناسبة ..100 جم زيادة لن تضر و يمكن استخدامها او استبدالها من التاجر بأخرى ..لكن 100 جم ناقصة ربما لا تجدي مثيلتها في السوق و تعلمين كم هذا مكلف في الوقت و المال و الجهد

11- هناك محلات تبيع خيوط بالكيلو من خامات متعددة و أشكال لا تجديها في الشلات ..جربيها و لكن اسألي تاجر ثقة او زبونة ذات خبرة

12- حجم الإبرة المناسب هو أحد العومل التي تحافظ على جحم القطعة بعد غسلها

13- انتقاء قياس الخيط أيضا مهم لتطبيق باترون جاهز

14- احتفظي بخيط ذو جودة و سعر منخفضين لتتعلمي فيه تقنيات و غرز جديدة و احتفظي بهذه العينات كمرجع لك للاختيار من بينها لانتاج مشغولات جديدة فيم بعد

15- لا تخشي العمل على قطعة تبدو صعبة ...فالماهرات كنّ في يوم مثلك مبتدئات ..و لعلك موهوبة مثلهن أو أكثر لكنك لم تختبري موهبتك بعد


مش كل الموهير طبيعي ولا كل الموهير مشعر زي الفرو (أنا عموما مش غاوية المنفوش ده)
في نوع موهير طبيعي زي وبر الجمل خشن شوية و ألوانه جميلة جدا
خيوط أنجورا (بلد في تركيا مش ماركة) اللي هي أنقرة ممتازة
و الأصواف و الموهيرات الطبيعية عموما بتدفي بس حسب النسبة لكن عموما بتدفي عن الخيوط الصناعية
كواليتي خيط حلو و متماسك و نتيجته و ألوانه حلوة
بس ده شريحة سعر و جودة و الموهيرات و الأصواف سعر و جودة تانية..مفيش مقارنة لإن كل واحد له استخداماته
مع كده أنا بفضله (كواليتي) عن غيره في حاجات معينة
غير انك بتحددي تكلفة القطعة حسب قيمتها و امكانياتك وقتها قبل ما تشتغلي و بتحطي قدامك بدايل و تختاري
قطعة مثلا مشغولة صوف او موهير (اقصد بالصوف يعني صوف طبيعي) بتبقى قطعة قيمة و مش بتجيبيها لشنطة مثلا او تتعلمي فيها
دي قطع خاصة بالتدفئة و مش أي حد يتحمل حرارتها
حلوة في شال الكتف و شال الرجل مثلا
و ده شكل من الموهير

و في منه الوان كتير و ماركات مختلفة

طيب كوفية رجالي مثلا ..يبقى صوف مش موهير لإن مش أي بشرة تتحمل خشانة الموهير ده

الأطفال أفضل لهم الصوف عن الموهير لنفس السبب

كواليتي ايه مميزاته
حلو في الملابس و الكوفيات و سعره ممتاز لإن الأرخص منه سيء و الأغلى منه غالي فعلا
حلو تتعلمي فيه و ممكن طبعا تهادي منه و تعملي منه بطاطين و شنط لإنه متماسك و مجدول حلو و ألوانه حلوة

يعني في خيطة اسمها كاميليا تعبئة مصري بس مش قادرة اعرفلها منشأ ... حلوة و بتلمع و ناعمة جدا ..بس انتي و حظك في كل شلة
في شلات معيوبة من جواها ..و العادي انك بتجيبي نفس الخيط و ممكن تخلطي منه الوان
لكن كاميليا دي لأ للأسف لإن بيعملوا تلوين لخامات مختلفة ..يعني ممكن تجيبي خيطة نبيتي تلاقيها سميكة جدا ماتنفعش كروشيه ..و تجيبي اللبني تلاقيه قريب للحرير من نعومته و رفعه..مش دايما تقدري تشتري منه لونين لنفس الشغل
انتي و حظك فيه بجد ..ألوانه جميلة و زاهية و بجد نادرة ... بس يا تصيب يا تخيب
مع كده بجيبه لاستخدامات معينة و سعره تقريبا حوالي 5 و نص و بيختلف إذا هتجيبيه من مكان غالي او رخيص

ده كاميليا
هو سميك عن الصورة و لمعته زي ما انتي شايفاها ..بيلمع عن كواليتي ..بس كواليتي ممكن تقولي مضمون عنه..بتبقي عارفة الخيطة اللي هتشتريها مش منوع زي كاميليا
بس في النوعيات دي من الخيوط قلبي الشلة قبل ما تجيبيها عشان في شلات بتبقى شبه مخلفات الحرب و من جواها عجب


طيب دلوقتي لو انتي لسة جديدة في الخيوط و عايزة مايتضحكش عليكي و يتقالك خيطة حلوة و خلاص ..تعملي ايه
اولا مش كل التركي تركي .. أسمع ان في خيط مصري ببادج تركي  عادي طبعا
في نوعيات معروفة جدا و تعتبر مضمونة نسبيا .. و كل ماركة ليها اصدارات
زي superba , nako , ALIZE, HIMALAya
دي هتلاقيها عند معظم البياعين و دي من الخيوط المخلوطة بطبيعي
في حاجات تانية ناس بتبيعها و ناس لأ
طيب تعرفي الخيطة اللي هتشتريها ازاي؟
الخيط مع الوقت بتحسي بيه ... بس مبدئيا اقلبي الورقة و اقرئي المكتوب على ضهرها
هتلاقي نسبة الصوف اللي فيها wool او yün و ده صوف طبيعي و نسبته من أول 25 في المية تقريا بس كل ما يعلى يبقى احسن
و في الموهير mohair
و في القطن cotton أو pamuk
في اكريليك akrilik أو acrilic
و في بوليستر polymide او polymid
و كتير انواع بيبقى مكتوب عليها مقاس الابرة اللي تنفعلها سواء كروشيه و تريكو ..بس خلي بالك علشان احيانا بتبقى بمقاس الابر الانجليزي

وسواء البوليستر او البوليميد خامات صناعية وجودهم في الخيط بيفرق في نعومته او تماسكه او شكله ..لإن في أشكال و تزيينات بتتعمل في الخيوط باستخدامهم
و في طبعا طبيعي خام مش مخلوط بس مش كتير و غالي
النسبة اللي مكتوبة جنب الخامة بتعرفي منها قيمة الخيط اللي بتختاريه و مع الوقت بعينك هتجيبي الصوف و الموهير بالنظر و تعرفي الخيط الصناعي منغير ماتقلبي في الورقة
الخيط الصيني في منه قيم و في منه غير كده
في خيوط للبيبي صيني طبعا الوانها مش هوصفلك .... بس غالية زي التركي الطبيعي (و في تركي بيبي طبعا ) و مش كل التركي طبيعي ..في بوليسترات حسب حاجتك بتختاري
الميزة في الصيني انها ناعمة على الأطفال و الوانها اللي مش هتلاقيها في غيرها..بس غالية

في خيوط بينزلها كتالوج او عينات في المحل زي alize مثلا
الشركة بتوزع عينات مشغولة في كتالوج ...ده بيساعدك تتخيلي نتيجة الشغل و خصوصا لو خيط جنجاه..اطلبي من البياع يوريكي عينات الخيوط
في وجهة نظري لما اختار ..الحريمي موهيرات و ممكن صوف و بوليستر
و الرجالي صوف
و الأطفال على حسب بس ابعد حاجة اختارهالهم الموهير لإن لازم تحته قطن سميك

لو هدية لماما او حماتك او جدتك مثلا و عايزاها تبقى قطعة غالية (مهما عملتي هتبقى ارخص من حاجة بوليستر جاهزة و مش بقيمتها) يبقى موهير
و لو كوفية رجالي يبقى صوف طبعا بس مخلوط علشان في ناس ماتتحملش الصوف الطبيعي من الخشونة و كمان الأجسام الحارة ماتتحملش الصوف ولا الموهير و أحسنلهم البوليستر او صوف 25 في الميه كفاية
الموهير و الصوف حلو جدا لكبار السن و قليلي الشحوم و مرضى الانيميا عافانا الله و إياك
بس كوفية موهير تبقى في نظري صعبة إلا مع حد مابيفرقش معاه اللبس الخشن ..لكن الأفضل صوف بنسبة مش صافي
و طبعا البوليستر يصلح للغالبية كلبس خارجي
الموهير زي ما قلتلك خشن نسبيا و فكه صعب ..بس طبيعي يعني لما تشتغلي قطعة موهير بتبقى منتقاة و قيمة ..مش للفك ..يعني استخدميها و اديها لحد بعدك لإنها مهما قدمت قيمة جدا (و اشتري خيطها بعناية لإنه مش رخيص)
هتلاقيني منحازة للموهير مع إني مش بستخدمه كتير  ..سبحان الله
لو بتتعلمي ..اديها بوليستر ولا يهمك ...
أتمنى أكون أفدتكن